Google blog lamah mobile phone atangin post a harsa si a. WordPress lamah ka’n enchhin ang e. Hei, a theih a ang riau mai.
Upatna hri
Hun leh ni a liam zel a, rin loh karin hringnun chawhnu lamah ka hun hmang ve tan ta mek a lo ni reng mai. Infiamna kutpui neih nikhua ah pawh ‘veteran’ lamah kan tel ve ta zak zak mai. Mithenkhat intih naupan reng tum tan chuan chanchin thalo a ni thei ang a, keini ang kum lama buai ve lo tan chuan upatna hi kan tan buaina a tling ve reng reng lo. Enge maw tih nikhuaah “Ka pu” tia min ko nawlh nawlh tawk an lo awm ve leh zel te hi nuam deuh mai a nia.
Engati nge mithenkhat hian upata senior nih hi an hlauh em em thin le? Upa tur chuan vanneih a ngai asin. Kan unaupa pakhat pawh a nupui fanaute nen hlim taka khawsak chhoh ve a, upat hnu thlenga fate enkawl chhoh zel a chak em em chungin Pathianin a remti miau si lova, ui chung chungin he khawvela inhmu leh tawh ngai lo turin hringnun hi a chhuahsan asin. Upatna hi Pathian khawngaihna liau liau a ni. A naupan reng theih lohva, kan duh emaw duhlo emaw nitin darkar tinin kan upa tulh tulh dawn tho tho. Kan thianpa pakhat BA zir zo tawh, BEd a training lai mek khan “Kei chu ka la naupang em mai a,” a ti thla zen thin a. A dik, keini ai chuan a naupang, mahse amah hrim hrim kha a naupang lem lo. A sawia insawi naupan chi a ni lo. Engkim hian hunbik a nei a, naupan hun a awm ang a, upat hun pawh a awm ture a ni dawn lawm ni. Kan thil tawn apiangah hian kan in adjust thiam ve zel chu a ngai dawn a lo nih hi.
Kei pawh, mi fate’n infiamna an chawlhsan hun, inkhelmi te pawn an boot an dah thata inkhelh an bansan hmiah hun kum bawr chhovah inkhelh lam ka han buaipui chho ve leh a. Thenkhat tan chuan a nuihzatthlakin a atthlak dawn mang e aw. A hun hi chu a dik tawh chiah lo na a, ka ti lo thei si lo. Mahse hei hi zawng, ka hriselna hian a mawmawh maiu si a, ka ti lo thei lo anih hi.
Kumthar, hmasawnna rahbi thar chuang si lo maw…..
Kum 2012 kumthar kan lo chuangkai leh ta. Mi tamtakin rilru thar nen, thiltum thar nen kumthar an lo hmuah laiin kei ve chuan ka nihna ngai ang angin, a ngaite bawkin kumthar ka nghak chhuak a. Hmatiang sawn zai reng lah ka rel thei si lo. He kumthar ah hian eng tiangin nge hmathar ka han lak ve ang a, engtiangin nge kawngthar ka han sahkuak ve dawn le. Mite chuan kumthar resolution insiamin tihtur hmabak ko tak tak an intuk a, kei ve lah chuan tihhlawhtlin loh hlauvin tihtur engmah ka intuk ve ngam si lo. Kumthar ruaitheh chiah hi ka hmabak inchhawp a lo ni thin ni ta berin ka hria. He hringnunah hian hmatiang sawn thei tur chuan ruahmanna tha tak siam te, chu ruahmanna chu tihhlawhtling thei tura nasa taka beih te, tih hram hramna neih te, teirei peihna te hi a lo pawimawh dawn khawpin ka hria. Keini ang thatchhe tan hi chuan hringnunah hian hlawhtlinna hi a lo awm mawlh mawlh si lo. Blog takngial pawh tihian ka’n siam ve uk a, ka enkawl tha leh zo chuang si lo…..
A va khat raih raih ve le
Ka tlawh khat em avangin ka blog hi a awm pawh ka ring tawh chiah lova, mahse ngaiteh, hei, ka han enchhin a, a lo la awm tha hle anih hi. Tihian blog kan han siam ve uk chu a nia, a siamtu ber pawhin ka tlawh peihlo chu anih si hi. Mahni blog pawh tlawh peih lo tu chuan midang blog phei chu a tlawh peih dawn miah lo tihna a va nih hmel ve.
Eng pawh nise, tihian lo awm leh rih phawt mai se, ka hman hunah a hranpa ngatin thu sawngnawi tak tak nen ka lo let leh ang.
Kan damlai ni te hi
Kan damlai ni te hi rin aiin a va lo rei lo tak em. Ka naupan lai te kha hman kum lawk kha ani ta maiin ka hria. Hriat loh karin kum a ral zung zung mai anih hi. Mi te ngaih ah chuan ka upa ve thawkhat tawh na a, mahni hi chuan han indah upat a har thin ngawt mai. Damchhung reilo te hi tum bur chungin nge ka hmanral ang a, hlim leh nui sang chungin aw…. Mite hian ‘pa hlim thei tak anih kha maw le’ tiin min hre reng thei sela ka lawm khawp ang; mahse pa hlim thei tak ka ni mawlh si lo.
Nung turin hrehawm takin kan piang a, thi turin hringnun lamtluang kan zawh leh a, chumi hnuah chatuana nung tawh turin kan la thi leh ang. Khawvela kan rawn chhuah dan hi chu a inang deuh vek a, khawvel kan chhuahsan dan tur erawh a inang lo nuaih thin. A thenin hahdam taka khawvel an chhuahsan laiin, a then chuan rilru hah takin an chhuahsan ang a, a then erawh chuan na leh hrehawm tinreng tuarin khawvel an chhuahsan dawn si. Thlarau khawvela kan chhawm theih miah loh tur rosum, tangka, ram, rangkachak, te buaipuiin kan hmanhlel chu a ni si a. Chatuan hawlh phak rohlu erawh ka ngaihsak peih si lo.
A bul tanna
Helam ah pawh blog i han siam ve leh dawn ang hmiang. Kut hlei na na na chuan ek thing… oh hmeh chhuah tur zawk mawle, kan tawng ve zel chu anih hi.
He blog ah hian chhiar tlak thu tha dah tur ka nei dawn em ka hre lo. Chhiar tlak a awm lo anih pawhin ka ninhleina hmun tura ka duan ve chhin chu ani reng reng e.
Hello world!
Welcome to WordPress.com. This is your first post. Edit or delete it and start blogging!
Caribou 